俗語有云，遲到好過無到嘛。
今年10月修例後，相信99.99%的柴油私家車都會禁售，所以這一刻應該都入到直路見到格仔旗。最後一個圈先落場的新挑戰者，是Hyundai的Santa Fe。大家都知Hyundai同Kia是姊妹花。Kia有部Sorento Diesel，Hyundai又點會無柴油Santa Fe呢?只是後者現在才到。Sorento總共有三個版本，最貴賣$388,880，而Santa Fe就只得一個version，就賣$379,900。雖然兩車用一樣的引擎、波箱、座位佈局，但香港賣的Sorento Diesel是長陣版，軸距和車長都比Santa Fe多80mm，所以賣貴少少都有道理。論中排和尾排座位，Sorento的legroom都是稍稍贏出。坐低，Santa Fe的尾門比Sorento斜少少，所以會比較頂頭。至於設備，其實兩者差不多，19吋鈴、巨型天幕、HID自動頭燈、雙區恆溫冷氣、前座暖櫈、電子手掣加auto hold功能、前後parking sensor連泊車鏡頭等等大家都有，Santa Fe就多一個安全氣袋，而Sorento就有前座冷氣櫈。
200匹兼有45kgm的柴油引擎，論本地日韓大中小型SUV，輸出都算數一數二。起動非常輕鬆，就算部車有兩噸，都是有心有力。這副柴油引擎出奇地有持久力，雖然後段沒爆破場面，但由 3,000rpm一路踩到上4,200rpm都沒有大幅軟化，轉波前動力接近是水平地出現，最重要是傳到入車廂的不是鬼哭神嚎，論引擎艙隔音力，水平比Sorento高半級。Santa Fe有三個driving mode：eco、normal 和sport，其實變化的只是油門敏感度和轉波時機，但由起步到中段再提速，sport mode都積極好多，話頭醒尾，勤奮又有魄力。開起來是很傳統的四驅大型SUV，重心高，軚盤有重量但不算很清晰，好在下盤都幾貼服，就算彎多路窄，要開得快都不是太難搞。
規格 引擎: 2,199c.c.直四柴油turbo 馬力: 200匹/3,800rpm 扭力: 45.0kgm/1,750-2,750rpm 傳動: 四輪驅動 6前速自動波 0-100km/h: 9.6s 極速: 203km/h 體積: 4,700 x 1,880 x 1,690mm 重量: 1,940-2,078kg 油耗: 7.1L/100km 售價: $379,900